Kyaddaki Poliisi y’e Naggalama ekutte omuvubuka omusawo, abadde yeegumbulidde okusobya ku bakyala mu disitulikiti y’e Mukono ne Kayunga.
Omusawo omuvubuka akwatiddwa mufere nga yasobola okweyambisa emikutu migatta abantu okweyita Dr. Ronnie era abadde asobeza ku bakyala ab’enjawulo.
Dr. Ronnie abadde alina face book mu mannya ga ‘Medical Scrub Uganda’ okunoonya abasawo abanoonya emirimu.
Singa omukyala yenna asaba omulimu ku Face Book, abadde amuyita okugezesebwa era bangi basobezeddwako nga batwalibwa mu nsiko n’ebifo ebirimu enzigota.
Nga 11, March, 2023, yayita omusawo omuzaalisa myaka 24, omutuuze we Kireka mu Kampala era yamutwala ku kyalo Ntunda mu muluka gwe Ntunda mu disitulikiti y’e Mukono era oluvanyuma yamusobyako.
Omukyala oluvanyuma lw’okutwala omusango ku Poliisi, Dr. Ronnie yakwatiddwa.
Okusinzira ku mwogezi wa Poliisi mu ggwanga Fred Enanga, okunoonyereza kulaga nti Dr. Ronnie, amannya ge amatuufu ye Lubega Ashraf myaka 18, omutuuze ku kyalo Katosi mu ggoombolola y’e Kisoga mu disitulikiti y’e Mukono.
Enanga agamba nti Lubega talina maka gamanyiddwa wabula abadde asula mu loogi.
Wadde Poliisi eri mu ntekateeka okutwala Lubega ku misango gy’okusobya ku bakyala n’obubbi, Enanga alabudde abantu abanoonya emirimu, okwegendereza abantu nga Lubega.
Enanga agamba nti abantu bangi battiddwa nga bagezaako okunoonya emirimu nga bayita ku mikutu migatta bantu n’okusingira ddala ogwa Face Book.
