Poliisi ekutte abayizi ba Yunivasite e Makerere 7 abakedde okwogerako eri bannamawulire.
Abayizi bagamba nti baabadde balina okuba olukungaana ku Yunivasite e Makerere kyokka baalemeseddwa abakulira ebyokwerinda, kwe kuddukira ku Emerald Hotel, e Wandegeya, okutegeeza eggwanga ensonga zaabwe.
Abayizi, bazze nga balina ensonga eziwerako, omuli Yunivasite okuwera ebibiina byobufuzi ku Yunivasite nga yekwasa nti bigendereddwamu okutabula abayizi, okuwera enkungaana nga balina kweyambisa mitimbagano omuli Face Book, Tiktok n’emirala.
Mu bayizi bano, mulimu abesimbyewo ku bukulembeze obw’enjawulo e Mekarere (Guild President) kyokka bagibwa mu lwokaano mu bumenyi bw’amateeka, kye bagamba nti kityoboola eddembe lyabwe.
Nga bakulembeddwamu Margaret Nattabi, bawadde Yunivasite nsalesale okutuusa olunnaku olw’enkya ku Lwokubiri, ng’abayizi bonna abagibwa mu lwokaano, baziddwamu oba sityo, balangiridde akatiisa.
Mu lwokaano omuli abayizi 11, abayizi 2 bagiddwamu omuli Margaret Nattabi owa National Unity platform- NUP ne Sulaiman Namwoza nga talina kibiina.
Okusinzira ku ntekateeka, abayizi balina okulonda abakulembeze baabwe nga 14, April, 2023.
Abayizi, balabiddewo nga Poliisi etuuka era bakwatiddwa wakati mu kusika omuguwa.
Patrick Onyango, Omwogezi wa Poliisi mu Kampala n’emirirwano, agamba nti abayizi abakwatiddwa batwaliddwa ku Poliisi y’e Wandegeya.
Bano, bali ku misango gy’okukuba olukungana mu ngeri emenya amateeka.
